අමාත්‍යවරයා මේ බව පැවසූයේ පසුගියදා යාපනයේ සිදුකළ සංචාරය අතරතුර යාපනය රදගුරුතුමා සමඟ රදගුරු නිල නිවසේ දී සිදුකළ සාකච්ඡාවක දී ය.
යාපනය රදගුරු ජස්ටින් ඥානප්‍රගාසන් හිමියන් මතුකළ කරුණු ද සලකා බලමින් ඒ පිළිබඳ අදහස් දැක්වූ අමාත්‍යවරයා,
“මේ වනවිට අපේ රජය උතුරු-නැගෙනහිර විසඳියයුතු සහ මැදිහත්විය යුතු ප්‍රධාන ක්ෂේත්‍ර ලෙස අධ්‍යාපනය, කෘෂිකර්මාන්තය සහ ධීවර කර්මාන්තය යන අංශ හඳුනාගෙන තිබෙනවා. ඒ ඒ ක්ෂේත්‍රයන්ට සුවිශේෂිත වැඩසටහන් සහ සැලසුම් මේ වනවිටත් ක්‍රියාත්මක මට්ටමේ පවතිනවා. අපි වාද විවාද මත විරසක නොවී මේ වැඩසටහන්වල ප්‍රතිඵල ලබා ගැනීමට උත්සුක වියයුතුයි කියා මා හිතනවා.
විශේෂයෙන් ම මේ පළාත්වල දූ දරුවන්ට සිංහල භාෂාව ඉගැන්වීම ඉතා වැදගත්. දකුණේ පාසල්වල මේ වනවිට දෙමළ භාෂාව ඉගැන්වීම ඉතා සාර්ථක ලෙස කෙරීගෙන යනවා. ඒවගේ ම උතුරු සහ දකුණේ පාසල් අතර අන්‍යෝන්‍ය සබඳතා පවත්වාගෙන යාම අතිශයින් ම වැදගත් වෙනවා.
සිංහල ඉගෙන ගැනීමට මේ පළාත්වල දරුවන්ගේත් තිබෙන්නේ ඉහළ උනන්දුවක්. මෙහි ප්‍රධාන ගැටලුව වී තිබෙන ගුරු හිඟය පිරවීම සඳහා අමාත්‍යංශ මට්ටමින් අවශ්‍ය සියලු පියවර ගන්නට පෙරොන්දු වෙනවා” යනුවෙන් ද පැවසී ය.
