ලෙස්ටර් ජේම්ස් පීරිස් නම්,සමස්ථාර්ථය තුළ අප දකිනුයේ භෞතිකව නොව අධ්‍යාත්මිකව ද සිනමාත්මක දැක්මෙන් ද විශාලනය වූ යෝධ සිනමා සිත්තමක් බව අභාවප්‍රාප්ත මහා සිනමාකරු ආචාර්ය ලෙස්ටර් ජේම්ස් පීරිස් මහතා පිළිබඳ ශෝක පණිවුඩයක් නිකුත් කරමින් ජනාධිපති මෛත්‍රිපාල සිරිසේන මහතා ප්‍රකාශ කරයි.

ලාංකේය සිනමාවේ පුරෝගාමී විශිෂ්ටයන් අතර අද්විතීය, අග්‍රගණ්‍ය සිනමා ලකුණ ආචාර්ය ලෙස්ටර් ජේම්ස් පීරිස් මැතිතුමන් බව අවිවාදිතය. එතුමාගේ විප්ලවීය සිනමා මෙහෙවර අප සිනමා ක්ෂේත්‍රය දකුණු ඉන්දියානු ආධිපත්‍යයෙන් මුදවා ලාංකේය අනන්‍යතාව සහිත නව මඟකට යොමු කරන්නටද, ලෝක සිනමාව හා එක්ව ගමන් කළ හැකි කලාත්මක විශිෂ්ටත්වයක් කරා ඔසවා තබන්නටද සමත් විය.

ලාංකේය සිනමාව පුරෝගාමි මෙහෙවරක් සිදු කළ ආචාර්ය ලෙස්ටර් ජේම්ස් පීරිස් මහතාට උපහාර පිණිස ''සිනෙපති ලෙස්ටර් ජේම්ස් පීරිස් ගම''නමින් උදා ගම්මානයක් සඳහා පෙරේදා 29 දින තිස්සමහාරාම ජූල්පල්ලම ග්‍රාමයේ දී මුල්ගල තැබිණි.