යුද්ධ හමුදාධිපතිවරයාගේ සංචාරයේ දී කලවාන - අඟලවත්ත - රත්නපුර මාර්ගය, අයගම - ගවරගිරිය මාර්ගය සහ නිවිතිගල ප්‍රදේශයේ යුද්ධ හමුදා භට පිරිස් විසින් සිදු කරනු ලබන මාර්ග පිරිසකර කිරීමේ කටයුතු නිරික්ෂණය කළ අතර, විපතට පත් සිවිල් වැසියන්ගේ අවශ්‍යතාවයන් පිළිබඳව ද සොයා බලන ලදී.
12 වන ක්ෂේත්‍ර ඉංජිනේරු බලකායේ භට පිරිස් යුද්ධ හමුදා යන්ත්‍රෝපකරණ උපයෝගි කර ගනිමින් කලවාන - අඟලවත්ත - රත්නපුර ප්‍රධාන මාර්ගයේ අත්වැල්තොට ප්‍රදේශයේ අවහිරව තිබූ අඩි 500 ක පමණ ප්‍රමාණයක් පිරිසිදු කර ගමනාගමන කටයුතු නැවත යථාතත්වයට පත් කළ අතර, බදුවත්ත මංසන්ධියට සහ අම්බලන්පිටිය ගම්මානයට නුඳුරු ඇහැළියගොඩ - දෙහිඹ්විට මාර්ගය ද පැවති අවහිරතා ඉවත්කරමින් පිරිසිදු කරනු ලැබීය.
5 වන ක්ෂේත්‍ර ඉංජිනේරු බලකායේ සහ 583 බලසේනාවේ භට පිරිස් විසින් කඩා වැටුණු ගස්, ගල් සහ වෙනත් බාධක ඉවත් කරමින් පැය නවයක කාලයක් ඇණහිට තිබු අයගම - ගවරගිරිය මාර්ගයේ ගමනා ගමනය නැවත යථාතත්වයට පත් කිරිමට සමත් විය.
ප්‍රධාන ක්ෂේත්‍ර ඉංජිනේරු මේජර් ජෙනරාල් ධනංජය කරුණාරත්න මහතා, 583 වන බලසේනාවේ බලසේනාධිපති, 5 වන ක්ෂේත්‍ර ඉංජිනේරු බලකායේ සහ 12 වන ක්ෂේත්‍ර ඉංජිනේරු බලකායේ අණදෙන නිලධාරිවරුන් ඇතුළු ජ්‍යෙෂ්ඨ නිලධාරින් ද යුද්ධ හමුදාධිපති සමගින් මෙම සංචාරය සඳහා එක්ව සිටියහ.
