එහිදී 2030 වන විට එක්සත් ජාතීන්ගේ සංවිධානය විසින් ලෝකය පුරා ක්‍රියාත්මක කිරීමට නියමිත තිරසර සංවර්ධන සැලැස්ම හා  එම සැලැසුම තම ව්‍යාපාර සඳහා ආදේශ කර ගන්නා ආකාරය පිළිබඳව කර්මාන්තකරුවන් දැනුවත් කරන ලදී.

එක්සත් ජාතීන්ගේ සංවිධානය ක්‍රියාත්මක කරන 2030 තිරසර සංවර්ධන සැළස්මට අනුව ශ්‍රී ලංකාවේ රාජ්‍ය හා පුද්ගලික අංශයේ කර්මාන්ත සඳහා ජාත්‍යන්තර ප්‍රමීතීන් හඳුන්වාදීම මෙම වැඩසටහනේ මූලික අරමුණ විය. මෙම තිරසර වැඩසටහන් සැළැස්මට ඉළක්ක 17ක් අයත්ය.

ඒ අතරින් දුගී භාවය තුරන් කිරීම, සෞඛ්‍ය ක්‍ෂේත්‍රය නගා සිටුවීම, දළ ජාතික නිෂ්පාදිතය සඳහා කර්මාන්තවල දායකත්වය වැඩි කිරීම, කාර්මික ක්‍ෂේත්‍රයේ රැකියා නියුක්තිය වැඩි කිරීම, අගය එකතු කළ නිෂ්පාදන ප්‍රතිශතය වැඩි කිරීම වැනි ඉළක්ක ප්‍රධාන වේ.

මෙහිදී 2030 තිරසර සංවර්ධන සැළැස්ම පිළිබඳව කර්මාන්තකරුවන් දැනුවත් කළ යුනිඩෝ (UNIDO)  නිත්‍ය නියෝජිත ආචාර්යය රෙනේ වෑන් බර්කල් මහතා (Rene Van Berkel) ප්‍රකාශ කෙළේ මෙම සැලසුම හරහා ආසියානු රටවලට ඇමරිකානු ඩොලර් ට්‍රිලියන  05ක වෙළෙඳ අවස්ථා හිමි වන බවයි.

මෙම අවස්ථාවේදී අදහස් දැක්වූ රිෂාඩ් බදියුදීන් අමාත්‍යවරයා,

" ශ්‍රී ලංකාවේ කර්මාන්ත ක්‍ෂේත්‍රයේ ශීඝ්‍ර වර්ධනයක් පසුගිය කාලයේ පෙන්නුම් කර තිබෙනවා. අපේ දළ ජාතික නිෂ්පාදිතයෙන් 30%ක දායකත්වයක් කර්මාන්ත අංශයෙන් ලබා දෙනවා. එය ජපානය ඕස්ට්‍රියාව, ස්පාඤ්ඤය වැනි දියුණු රටවලින් ලබා දෙන අනුපාතයට සමානයි. රටක ආර්ථික සංවර්ධන දැක්මේ ප්‍රධාන ස්ථානයක් අපනයන ක්‍ෂේත්‍රයට හිමිවෙනවා. එම නිසා අපනයන සම්බන්ධ කර්මාන්තවල වැදගත්කම තවත් වැඩිවෙනවා. පසුගිය වර්ෂයේදී (2016) අපි ඇමරිකානු ඩොලර් බිලියන 7.7ක් වටිනා කාර්මික අපනයන සිදු කළා. එය අපගේ සමස්ථ අපනයන ආදායමෙන් 2/3 ක් වනවා " යැයි පැවසීය.

මේවන විට එක්සත් ජාතින්ගේ කර්මාන්ත සංවර්ධන සංවිධානය (UNIDO) විසින් ඇමරිකානු ඩොලර් මිලියන 10 ක ව්‍යාපෘති ශ්‍රී ලංකාව තුළ ක්‍රියාත්මක කරයි.

මෙම අවස්ථාවට යුනිඩෝහි විශේෂ නියෝජිත පිරිසක්, කර්මාන්තකරුවන්, රාජ්‍ය හා පෞද්ගලික අංශ නිලධාරීන්, විශ්වවිද්‍යාල ශිෂ්‍යයන් ඇතුලු පිරිසක් සහභාගී වූහ.