ඒ අනුව ප්‍රාදේශීය කෘෂිකර්ම කමිටු මට්ටමින් මේ උවදුර මැඩ පැවැත්වීම සදහා අවශ්‍ය සියළු කටයුතු යොදන ලෙසත්, කෘෂි කර්ම අංශවල සේවය කරන නිලධාරීන්ට අවශ්‍ය සෑම සම්බන්ධිකරණ කටයුත්තක්ම සළසා දෙන ලෙසත් දිසාපතිවරයා වැඩි දුරටත් උපදෙස් ලබා දෙන ලදී. දිසාපතිවරයා මෙම උපදෙස් ලබා දෙන ලද්දේ ඊයේ (22) මහනුවර දිස්ත්‍රික් ලේකම් කාර්යාලීය ශ්‍රවනාගාරයේ පැවති දිස්ත්‍රික් කෘෂිකර්ම කමිටු රැස්වීමේදීය.
සෙසු දිස්ත්‍රික්ක වලට සාපේක්ෂව මහනුවර දිස්ත්‍රික්කයේ සේනා දළඹු හානිය එතරම් ව්‍යාප්ත වී නොමැති බවත්, ඊට හේතුව මහනුවර දිස්ත්‍රික්කයේ බඩ ඉරිගු වගාව එතරම් ප්‍රචලිතව සිදු නොවන නිසා බවත් දිසාපතිවරයා පෙන්වා දෙන ලදී. මහනුවරින්
සේනා දළඹුවාගේ හානිය පිළිබද මුලින්ම වාර්තා වී ඇත්තේ දොළුව ප්‍රාදේශීය ලේකම් කොට්ඨාශයෙන් බව පැවසූ දිසාපතිවරයා හානි වූ ගොවි ජනතාව වෙත වන්දි ගෙවීම සදහා ගෙනයන වැඩසටහන ක්‍රියාත්මක කිරීමට අවශ්‍ය දත්ත ලබා ගනිමින් පවතින බවද පෙන්වා දෙන ලදී.
මහනුවර දිසාපතිවරයාගේ ප්‍රධානත්වයෙන් අද රැස්වූ මහනුවර දිස්ත්‍රික් කෘෂි කර්ම කමිටුවේදී සේනා දළඹුවා පිළිබදවත්, දළඹුවාගේ තර්ජනයෙන් ආරක්ෂා වීම සදහා යොදා ගත යුතු වැඩපිළීවෙල පිළිබදවත් කමිටු සාමාජිකයන් දැනුවත් කරන ලදී. ඒ සදහා කෘෂිකර්ම දෙපාර්තමේන්තුවේ ප්‍රධාන කීට විද්‍යාඥ එස්.එස් වැලිගමගේ මහතා සහ සහකාර කෘෂි අධ්‍යක්ෂ දමයන්ති උදලාගම මහත්මිය සහභාගී වූහ. කමිටුවේදී ලබා ගත් දැනුම යොදා ගනිමින් තම ප්‍රාදේශීය ලේකම් කොට්ඨාශ තුළද අවශ්‍ය දැනුවත් කිරීම් සිදු කරන ලෙසද දිසාපතිවරයා ප්‍රාදේශීය ලේකම්වරුන්ට උපදෙස් ලබා දෙන ලදී.
DMU/Kandy
