මේ හැර නියඟයෙන් පීඩාවට පත් දිස්ත්‍රික්ක වල ජනතාවට පානීය ජලය සැපයීම සඳහා 2018 වසරේ රුපියල් මිලියන 5.8 ක වියදමින් ජල ටැංකි 700 ක් දිස්ත්‍රික් ලේකම්වරුන් මඟින් බෙදාදුන් බවද ආපදා කළමනාකරණ අමාත්‍යාංශයේ ඊයේ (05) පැවති උත්සවයකදී ඇමතිවරයා කීය.

චීන රජය විසින් පරිත්‍යාගයක් ලෙස ලබාදෙන ලද ජල බවුසර් රථ 90ක් දිස්ත්‍රික්ක 25ක දිස්ත්‍රික් ලේකම්වරුන් අතර බෙදාදීම නිමිත්තෙන් මෙම උත්සවය සංවිධානය කොට තිබුණි.

මෙහිදී තවදුරටත් කතා කළ රංජිත් මද්දුම බණ්ඩාර මහතා, ජනාධිපති මෛත්‍රීපාල සිරිසේන මහතා පසුගිය දා චීනයේ සිදුකළ නිල සංචාරයේදී එරට රජයෙන් කළ ඉල්ලීමක් අනුව මෙම ජලබවුසර් පරිත්‍යාගය ලැබුණු බවත් ඒ පිළිබඳව තමා ජනාධිපතිතුමාටත්, චීන රජයටත් ස්තුතිවන බවත් කීය.

අමාත්‍යාංශයේ ලේකම් ජේ.ජේ. රත්නසිරි මහතා ද මෙහිදී කතා කළේය.

මොණරාගල, අම්පාර, කලුතර, පුත්තලම, කුරුණෑගල ඇතුළු දිස්ත්‍රික්ක 10 ක දිස්ත්‍රික් ලේකම්වරුන්ට සංකේතාත්මකව ජල බවුසර් පැවරීම අමාත්‍යවරයා අතින් මෙහිදී සිදුවිය.