ත්‍රිපිටකාභිවන්දනා සතිය වෙනුවෙන් ඓතිහාසික මැදිරිගිරිය වටදාගෙය පුණ්‍ය භූමියේ පැවැත්වෙන ධාතු ප්‍රදර්ශනය (20) පෙරවරුවේ ආරම්භ කෙරිණි. වස්කඩුව රාජගුරු ශ්‍රී සුභූති මහා විහාරයේ සිට වැඩමකරවන ලද ශ්‍රී සර්වඥ ධාතුන් වහන්සේ මෙලෙස ඓතිහාසික මැදිරිගිරිය වටදාගෙය පුණ්‍ය භූමියේ දී ප්‍රදර්ශනය කෙරෙන අතර හෙට සවස් වන තුරු එම ධාතුන් වහන්සේ වන්දනාමාන කර ගැනීමට ජනතාවට අවස්ථාව සලසා තිබේ.
මේ අතර ,ත්‍රිපිටකාභිවන්දනා, සතිය නිමිත්තෙන් ඇහැලියගොඩ තලාව ශ්‍රී විමලාරාම විහාරස්ථානයේ දී ද ධාතු ප්‍රදර්ශනයක් සංවිධානය කර තිබේ. කොළඹ මාළිගාකන්ද මහා බෝධි අග්‍රශ්‍රාවක විහාරස්ථානයේ සිට වැඩම කරවු අග්‍රශ්‍රාවක ධාතුන් වහන්සේ එහි දී මහජනතාවට වැඳ පුදා ගැනීමට අවස්ථාව සලසා ඇත.
හම්බන්තොට දිස්ත්‍රික්කයේ මැණික් රජමහා විහාරස්ථානයේ දී ත්‍රිපිටකාභිවන්දනා සතිය නිමිත්තෙන් ශ්‍රී සර්වඥධාතුන් වහන්සේ ප්‍රදර්ශනය කෙරේ.
කුරුණෑගල හෙන්ඩියගල පිරිවෙනේ සහ දංකොටුව පන්නල දේවරාජරාම විහාරස්ථානයේ දී ද ශ්‍රී සර්වඥ ධාතුන් වහන්සේ වැඳපුදා ගැනීමට ජනතාවට අවස්ථාව සලසා ඇත.
මේ අතර අම්පාර මහාවාපී විහාරස්ථානයේ දී ද සර්වඥධාතුන් වහන්සේ වැඳ පුදා ගැනීමට ජනතාවට අවස්ථාව සලසා තිබු අතර බංගලාදේශයේ චිතගොං විහාරස්ථානයේ සිට මෙරටට වැඩම කරවූ කේෂ ධාතු වහන්සේ එහි දී ප්‍රදර්ශනය කෙරිණි.
මෙලෙස එකම දිනවලදී දිවයිනේ විවිධ ස්ථානවලදී ශ්‍රී සර්වඥධාතුන් වහන්සේ වැඳපුදා ගැනීමට ඉඩකඩ සැලසීම ශතවර්ෂ ගණනකට පසු බැතිමතුන් ලද දුර්ලභ අවස්ථාවක් සේ සැලකේ.
මේ අතර ත්‍රිපිටකාභිවන්දනා සතියේ පස්වන දිනය වන මැදින් පුර පසළොස්වක පොහොය යෙදී තිබෙන (20) දවසේ දිවයින පුරා විහාරස්ථානවල විශේෂ වැඩසටහන් සංවිධානය කර තිබුණි. වසර 2500කට අධික කාලයක සිට වර්තමානය දක්වා ශ්‍රී ලංකා භික්ෂු පරම්පරාවේ නොමද දායකත්වය සහිතව සහ රාජ්‍ය අනුග්‍රහයෙන් සුරක්ෂිතව රැකගෙන ආ නිර්මල බුදුදහම ලෝකවාසී ජනතාවටත්, අනාගත පරපුරටත් නිවැරදි ලෙස ආරක්ෂා කොට දායාද කිරීමේ වැදගත්කම සහ ත්‍රිපිටක ධර්ම දායාදය පිළිබඳ ජනතාව දැනුවත් කිරීමේ විශේෂ ධර්ම දේශනා අද දිනය පුරා පැවැත්විණි.
සෑම පුන් පොහෝ දිනකම දිවයිනේ ප්‍රධාන විහාරස්ථානයක් කේන්ද්‍රකර ගනිමින් පැවැත්වෙන ජනපති සදහම් යාත්‍රා ධර්ම දේශනා මාලාවේ 48 වන දම් සභාව හෝමාගම පුරාණ විහාරස්ථානය කේන්ද්‍ර කර ගනිමින් පැවැත්වුණු අතර ආර්ය නිකේතන භික්ෂු පුහුණු මධ්‍යස්ථානයේ නිර්මාතෘ පූජ්‍ය මාවරලේ භද්දිය ස්වාමින්වහන්සේ එහි ධර්ම දේශකයාණන් වහන්සේ වූහ.
“ත්‍රිපිටකාභිවන්දනා” සතියේ හය වන දිනය වන හෙට දින ජනාධිපති කාර්යාලය සහ සියලුම ආණ්ඩුකාර කාර්යල එක්ව සංවිධානය කළ දානමය වැඩසටහන් ස්ථාන කිහිපයක් දී පැවැත් වේ.
