පළමුව මොණරතැන්න ශ්රී ධර්මවිජයාරාම විහාරස්ථානය වෙත ගිය ජනාධිපතිතුමා ආගමික වතාවත්වල නිරතව ආශිර්වාද ලබා ගත් අතර අනතුරුව සමරු ඵලකය නිරාවරණය කර නව සංඝාවාස ගොඩනැඟිල්ල විවෘත කරනු ලැබීය.
නව සංඝාවාස ගොඩනැගිල්ල සඳහා වැය කර ඇති මුදල රුපියල් මිලියන 05 කි.
මෙම අවස්ථාව සංකේතවත් කරමින් විහාරස්ථාන පරිශ‍්‍රයේ පැළයක් රෝපණය කිරීම ද ජනාධිපතිතුමා අතින් සිදු විය.
විහාරාධිපති පූජ්‍ය සේරුපිටියේ ආනන්ද නායක ස්වාමින් වහන්සේ ප‍්‍රමුඛ මහා සංඝරත්නය සහ ප‍්‍රදේශයේ සැදැහැවත් ජනතාව විශාල පිරිසක් මෙම අවස්ථාවට එක්ව සිටියහ.
එම ජනතාවගේ තොරතුරු විමසමින් සුහද කතා බහක නිරතවීමට ද ජනාධිපතිතුමා අමතක නොකළේය.
පොළොන්නරුව, නෙළුම්වැව ලංකාපුර රජමහා විහාරයේ රුපියල් මිලියන 02ක් වැය කරමින් ප්රතිසංස්කරණය කරන ලද නව සංඝාවාස ගොඩනැඟිල්ල සඝ සතු කොට පූජා කිරීමේ අවස්ථාවට ඉන් අනතුරුව ජනාධිපතිතුමා එක් විය.
විහාරස්ථානය වෙත ගිය ජනාධිපතිතුමා වෙත විහාරාධිපති පූජ්‍ය මැටිබැඳිගේ චන්ද්‍රවිමලංකාර නායක ස්වාමින් වහන්සේ ප‍්‍රමුඛ මහා සංඝරත්නය විසින් සෙත් පිරිත් සජ්ජායනා කර ආශිර්වාද පළ කළහ.
සංඝාවාස ගොඩනැඟිල්ල විවෘත කළ ජනාධිපතිතුමා එහි නිරික්ෂණ චාරිකාවක ද නිරත විය.
ආණ්ඩුකාරවරුන් වන පේෂල ජයරත්න, සුරේන් රාඝවන් යන මහත්වරුන් ඇතුළු පිරිසක් මෙම අවස්ථාවට එක්ව සිටියහ
