සාඩම්බර ඉතිහාසයකට හිමිකම් කියන ශ්‍රී ජයවර්ධනපුර විශ්වවිද්‍යාලයේ 60 වන සංවත්සරයට සමගාමී ව මෙම සම්මාන ප්‍රදානෝත්සවය පැවැත්වීමට නියමිතයි.
2000 වර්ෂයේ දී සේවාර්ජිත මහාචාර්ය සුනිල් ආරියරත්නයන්සගේ සංකල්පයකට අනුව දිවංගත ජ්‍යෙෂ්ඨ මහාචාර්ය තිස්ස කාරියවසම් මහතාගේ පූර්ණ සහයෝගයෙන් ඇරඹි විද්‍යෝදය සාහිත්‍ය සම්මාන උළෙල මඟින් මෙවර විශිෂ්ටතම කාව්‍ය සංග්‍රහය, විශිෂ්ටතම ගේය පද සංග්‍රහය,විශිෂ්ටතම කෙටිකථා සංග්‍රහය, විශිෂ්ටතම නවකතාව සහ විශිෂ්ටතම තීරු ලිපි සංග්‍රහය යන විෂය ඛාණ්ඩ පහක් යටතේ සම්මාන ප්‍රදානය කිරීමට නියමිතයි.
ඒ අනුව, 2019 සැප්තැම්බර් මස 03 වන දින ශ්‍රී ජයවර්ධනපුර විශ්ව විද්‍යාලයීය සුමංගල මැදුරේ සම්මන්ත්‍රණ ශාලාවේ දී ප.ව. 03.00 ට පැවැත්වීමට නියමිත අතර ප්‍රධාන ආරාධිත සහ මුඛ්‍ය දේශනය සේවාර්ජිත සුනිල් ආරියරත්නයන් විසින්
පැවැත්වීමට නියමිතයි.
මෙවැනි සාහිත්‍ය සම්මාන ප්‍රදානෝත්සවයක් පැවැත්වීම මඟින් ශිෂ්‍යන්ගේ දක්ෂතා වර්ධනය, රට තුළ සාහිත්‍ය උද්දීපනය පමණක් නොව ආකල්ප වර්ධනය සඳහා ද මහඟු රුකුලක් වනු ඇතැයි ද, මෙය හුදෙක් සාමාන්‍ය සාහිත්‍ය සම්මාන උළෙලකට
එහා ගිය සාහිත්‍ය කරුවන්ට වඩා වැඩි වටිනාකමක් ලබා දිය හැකි සම්මාන ප්‍රදානෝත්සවයක් වන බව ද ඒ සඳහා තම අධ්‍යනාංශයේ සියලුම කාර්යය මණ්ඩලයේ පුර්ණ සහයෝගය ඇතිව විනිවිදභාවයකින් යුතුව සිදු කරනු ලබන සාහිත්‍ය සම්මාන
උළෙලක් බව ද මානව ශාස්ත්‍ර හා සමාජ විද්‍යා පීඨයේ පිඨාධිපති මහාචාර්ය ශිරන්ත හීන්කෙන්ද මහතා මේ සඳහා සහභාගී වෙමින් පැවසීය.
ජ්‍යෙෂ්ඨ කථිකාචාර්ය පුජ්‍ය නාවලපිටිය අනුරාධා සුධම්මික භික්ෂුණිය, ජ්‍යෙෂ්ඨ කථිකාචාර්ය සුනේත්‍රා කන්කානම්ගේ සහ ජ්‍යෙෂ්ඨ කථිකාචාර්ය හන්සමලා රිටිගහපොල, ජ්‍යෙෂ්ඨ කථිකාචාර්ය කුසුමලතා ලංකාමුල්ල, ජ්‍යෙෂ්ඨ කථිකාචාර්ය සේනානි හරිස්චන්ද්‍ර ආදී ප්‍රවීණ ආචාර්යවරුන් රැසක් මෙම මාධ්‍ය හමුව සඳහා සහභාගී වුහ.
