මෙවර පැවැත්වූ ඔලිම්පියාඩ් තරගාවලියෙන් විද්‍යා අංශයෙන් එක් රන් පදක්කමක්, රිදී පදක්කම් එකක් සහ ලෝකඩ පදක්කම් 3ක් ද, ගණිත අංශයෙන් ලෝකඩ පදක්කම් 5ක් ද දිනාගැනීමට ශ්‍රී ලංකාව සමත් ව සිටී. ඒ අනුව, කොළඹ ආනන්ද විද්‍යාලයේ අත්සර ප්‍රනාන්දු ශිෂ්‍යයා විසින් විද්‍යා අංශයට අදාළ එම රන් පදක්කම දිනාගෙන ඇත.
වවුනියාව දෙමළ විද්‍යාලයේ මියුරන් ජතුර්ෂන් රිදී පදක්කම ද, අනුරාධපුර මධ්‍ය විද්‍යාලයේ සචිරු නන්දිත සුබසිංහ, මහනුවර උසස් බාලිකා විද්‍යාලයේ ලකල්නා අමරජීව, වවුනියාව රඹේකුලම බාලිකා මහා විද්‍යාලයේ ශප්තකී සෙන්දුරන්, විද්‍යා අංශයෙන් ලෝකඩ පදක්කම් ද මඩකලපුව මිල්ලෙත් මහ්ලියර් මහා විද්‍යාලයේ සෆීක් ජීනා නෆ්රින් සහභාගීත්ව සහතිකය ද ලබාගත් අතර, බදුල්ල මධ්‍ය මහා විද්‍යාලයේ රෙහාන් ආදිත්‍ය වීරකෝන්, යාපනය වෙම්බඩි උසස් බාලිකා විද්‍යාලයේ මෙනුෂා සිවකුමාර්, කෑගල්ල ශාන්ත ජෝසප් බාලිකා විද්‍යාලයේ තෙනුකි සිනෙලිකා බෝසිරිනි, ගාල්ල රිච්මන්ඩ් විද්‍යාලයේ තේජිත ඒකනායක, කුරුණෑගල මලියදේව විද්‍යාලයේ ගෝකුල නයනජිත් බණ්ඩාර ගණිත අංශයෙන් ලෝකඩ පදක්කම් ද දිනාගැනීමට සමත් වී ඇත.
අන්තර් ජාතික ගණිත හා විද්‍යා ඔලිම්පියාඩ් තරගාවලියට මෙවර රටවල් 26ක සිසුදරුවන් සහභාගී වූ අතර, ශ්‍රී ලංකාව මේ වනවිට රන් පදක්කම් 4ක් ඇතුළුව පදක්කම් 60ක් අත්කර‍ගැනීමට සමත්ව තිබේ. මේ සඳහා පාසල් මට්ටමේ සිට කලාප, පළාත් සහ ජාතික මට්ටම තෙක් ගණිත සහ විද්‍යා අංශයෙන් විශිෂ්ට ප්‍රවීණතා ලබාගන්නා සිසුන් අතරින් තෝරාගනු ලැබූ අතර, අධ්‍යාපන අමාත්‍යාංශයේ සෘජු මැදිහත්වීම යටතේ ජාතික මට්ටමින් අන්තර්ජාතික තරගය නියෝජනයට තෝරාගැනුණු සිසුන් සඳහා විශේෂ පුහුණුවක් ද ලබාදී තිබේ.
මෙම තරගාවලියේ කණ්ඩායම් නායක වශයෙන් කටයුතු කළ දෙහිඕවිට කලාපයේ සහකාර අධ්‍යාපන අධ්‍යක්ෂ ගයනිකා සුමුදු මහත්මිය, ගණිත නිබන්ධකවරයා වශයෙන් කටයුතු කළ කුරුණෑගල මලියදේව බාලිකා විද්‍යාලයේ එස්.කේ.එම්.බී කේ භානගුප්ත ගුරුතුමන් සහ විද්‍යා නිබන්ධක වශයෙන් කටයුතු කළ වයඹ පළාත් නියෝජ්‍ය අධ්‍යාපන අධ්‍යක්ෂ දුෂ්මා දි සිල්වා මහත්මියට ද අමාත්‍යවරයා මෙහි දී සිය කෘතවේදී ස්තුතිය පළ කළේය.
