2020 වසරේ විශ්ව විද්‍යාල ප්‍රවේශය සඳහා එකවර කණ්ඩායම් දෙකක් බඳවා ගැනීමට පියවර ගනිමින් සිටින බවද අමාත්‍යවරයා පැවසීය.
දෙගුණයක් සිසුන් එක් වර බඳවා ගැනීමේදී යම් යම් අභියෝගයන්ට මුහුණ දීමට සිදුවිය හැකි බව පැවසූ ඒ මහතා දැනට භාවිතා නොකරන දේශණ ශාලා ආදිය භාවිතා කිරීමට සහ රාත්‍රී කාලයේ දේශන පැවැත්වීම් වැනි ක්‍රම මගින් මීට මුහුණ දීමට සිදු වෙන බවද විශ්ව විද්‍යාල අචාර්යවරුන්ට සහ රාජ්‍ය අංශයට යම් යම් කැප කිරීම් සිදු වෙන බවද ඒ මහතා වැඩිදුරටත් සඳහන් කළේය.
අමාත්‍යවරයා මේ බව පැවසුවේ අද (31) රජයේ ප්‍රවෘත්ති දෙපාර්තමේන්තුවේ පැවති විශේෂ මාධ්‍ය හමුවට එක්වෙමිණි. දෙමව්පියන් සහ ශිෂ්‍ය ශිෂ්‍යාවන්ද මේ සඳහා තම සහයෝගය ලබා දෙන මෙන්ද උසස් අධ්‍යාපන අමාත්‍යවරයා වැඩිදුරටත් ඉල්ලා සිටියේය.
අ.පො.ස සාමාන්‍ය පෙළ සහ උසස් පෙළ ප්‍රථිපල ප්‍රමාද වීම නිසා දරුවන්ට මහත් අසාධාරණයක් වෙන බවත් ඉදිරියේදී අධ්‍යාපන අමාත‍්‍යංශය සහ විභාග දෙපාර්තමේන්තුව සමග එක්ව මේ සඳහා අවශ්‍ය පියවර ගන්නා බවත් ඒ මහතා පැවසීය.
මෙම ආයතන අතර නිසියාකාර අන්තර් සබඳතාවක් නොමැති වීමද මීට හේතුවක් වී ඇත. තවද නව විශ්ව විද්‍යාල කිහිපයක් විශ්ව විද්‍යාල පද්ධතියට එක් කිරීමට බලාපොරොත්තු වන බවද අමාත්‍යවරයා වැඩිදුරටත් සඳහන් කළේ ය.
