සංඥා පුවරු අසල සිටින බොහෝ යාචකයින් සැබෑ යාචකයින් නොවන අතර ඔවුන් ව්‍යාජ ලෙස ව්‍යාපාර කිරීමේ අරමුණින් මෙම වෘත්තියේ යෙදෙමින් සංඥා පුවරු අසල යම් යම් අවහිරතා සිදු කරන බවට බුද්ධි අංශ මඟින් හඳුනාගෙන ඇති බවත්, එමනිසා එම පුද්ගලයින් අත්අඩංගුවට ගෙන අධිකරණයට ඉදිරිපත් කිරීමට කටයුතු කරන බවත් ඒ මහතා කියා සිටී.
යම් පුද්ගලයෙකු වාහනයක සිට රියදුරෙක් හෝ එම වහනය තුළ සිටින වෙනත් අයෙකු මාර්ගයේ සිටින අයෙකු හට මුදල් ලබා දෙන්නේ නම් හෝ ඔවුන් විසින් සංඥා පුවරු අසල සිටින පුද්ගලයින්ගෙන් මිල දී ගැනීමක් සිදු කරන්නේ නම් ප්‍රධාන මාර්ගයක් අවහිර වන සේ කටයුතු කිරීම වරදක් වන අතර ඔවුන්ට එරෙහිව ජාතික මංමාවත් පනත යටතේ සහ මෝටර් වාහන පනත යටතේ නඩු පැවරීමට පියවර ගැනීමට රථවාහන පොලිස් නිළධාරීන්ට උපදෙස් දී ඇතැයි පොලිස් මාධ්‍ය ප්‍රකාශකවරයා අවධාරණය කර සිටී.
ඒ අනුව, කිසිඳු අවස්ථාවක සංඥා පුවරු අසල දී වාහනයේ විදුරු විවෘත කර ඒ අසල සිටින අයවලුන් හට මුදල් දීම හි ඔවුන්ගෙන් භාණ්ඩ මිල දී ගැනීමෙන් වළකින්නැයි ඒ මහතා වැඩිදුරටත් සඳහන් කර සිටී.
