විශ්වවිද්‍යාල ප්‍රතිපාදන කොමිසමේ අනුමැතියට යටත්ව ක්‍රියාවට නැංවෙන BCI හරිත විශ්වවිද්‍යාලයේ මෘදුකාංග සංවර්ධනය, වෙබ් වැඩසටහන් නිර්මාණකරණය,මෘදුකාංග ඉංජිනේරු විද්‍යාව ඇතුළු තොරතුරු තාක්ෂණ ක්ෂේත්‍රයේ පාඨමාලා රැසක් හැදෑරීමට සිසුන්ට අවස්ථාව පවතින අතර, දැනට පවතින උපාධි පාඨමාලාවලට අමතර ව රටේ ආර්ථික සංවර්ධනයට සෘජුව දායක වන නව උපාධි පාඨමාලා හඳුන්වාදීමට ඉදිරියේ දී පියවර ගත යුතු බව මෙහි දී අධ්‍යාපන අමාත්‍යවරයා පැවසීය.
BCI හරිත විශ්වවිද්‍යාලය සූර්ය බල විදුලියෙන් ක්‍රියාත්මක වන සමස්ත විශ්වවිද්‍යාල පරිශ්‍රය ම පරිසර හිතකාමී අයුරින් සකස් කොට ඇති විශ්වවිද්‍යාලයකි. නව රැකියා වෙළඳපොළ හා බොහෝ අධ්‍යාපන පාඨමාලා අතර පවතින නොගැළපීම ඉවත් කළ යුතු බව ද, සිසුන්ගේ අනාගත වෘත්තීය අවස්ථා සමඟ බද්ධ වන අයුරින් හා ආර්ථික සංවර්ධන ක්‍රියාවලිය සමඟ ගැළපෙන අයුරින් උපාධි පාඨමාලා නවීකරණය වීම යුගයේ අවශ්‍යතාවක් බව ද අමාත්‍යවරයා වැඩිදුරටත් පෙන්වාදුන්නේ ය.
