අමාත්‍යවරයා මේ බව ප්‍රකාශ කළේ, අද (07) පාර්ලිමේන්තුවේ දී පරිසරය සම්බන්ධව විපක්ෂයේ මන්ත්‍රිවරු විසින් යොමු කළ ප්‍රශ්නවලට පිළිතුරු ලබාදෙමිනි.
සංවර්ධන කාර්යයකට ඉඩ ලබාදෙන්නේ නම්, ඒ සඳහා සම්පූර්ණ පරිසර අධ්‍යයනයක් සිදු කරන බව ද පෙන්වා දුන් අමාත්‍යවරයා,එසේ නොමැතිව සංවර්ධන කටයුතු සඳහා අවස්ථාව නොදෙන බව පැවසීය.
මුතුරාජවෙල තෙත් බිමට අබලි ද්‍රව්‍ය බෙහැර කිරීම කාලයක් තිස්සේ සිදුව තිබෙන බවත් ඒ සඳහා පාතාලය පවා ක්‍රියාත්මකව තිබූ බවත් කී අමාත්‍යවරයා, මේ වන විට එම ක්‍රියාකාරකම් නවතා දැමීමට ක්‍රියාකළ බව කීය.
මෙවැනි ක්‍රියාකාරකම් සම්බන්ධව තරාතිරම නොබලා දඬුවම් ලබාදෙන බවත් ඒ පිළිබඳව තොරතුරු ඇත්නම් ලබාදෙන ලෙසත් අමාත්‍යවරයා ඉල්ලා සිටියේ ය. එක්ස්ප්‍රස් පර්ල් නෞකාව ගිනි ගැනීම හේතුවෙන් පීඩාවට පත් ධීවර ජනතාව වෙනුවෙන් කඩිනම් සහන ලබාදීමට ක්‍රියාකරන බව ද අමාත්‍යවරයා ප්‍රකාශ කළේ ය.
