සියම් මහා නිකායේ මල්වතු පාර්ශවයේ මහානායක අතිපූජ්‍ය තිබ්බටුවාවේ ශ්‍රී සිද්ධාර්ථ සුමංගල නාහිමිපාණන් වහන්සේගේ ආශිර්වාද මධ්‍යයේ ලුම්බිණි ශ්‍රී ලංකා මහා විහාරයේ භාරකාර ආචාර්ය පූජ්‍ය ගල්ලෑහැපිටියේ පේමරතන හිමියන්ගේ අනුශාසනා පරිදි භාරකාර නේවාසික හිමි ශාස්ත්‍රවේදි පූජ්‍ය තිස්සමහාරාමයේ පඤ්ඤාසාර හිමියන්ගේ මඟපෙන්වීම යටතේ කඨින පූජෝත්සවය ආරම්භ කෙරිණි.
මෙම ආගමික වැඩසටහන ඔක්තෝබර් 30 වන දින සවස සිදුහත් කුමරු උපන් මායාදේවි විහාරස්ථාන භූමියේ දී ආශිර්වාද පහන් පූජාවක් සහ පිරිත් සජ්ඣායනාවකින් ආරම්භ විය. ඔක්තෝබර් 31 වන දින අලුයම පෙරහැර මධ්‍යයේ කඨින චීවරය මායාදේවි විහාරස්ථානයට වැඩම කරවීමෙන් පසු ශ්‍රී ලංකා මහා විහාරයට වැඩම කරවා මහා සංඝරත්නය වෙත චාරිත්‍රානුකූලව භාර දෙන ලදි. දහවල් දානයෙන් අනතුරු ව කඨින චීවර පූජාව පැවැත්විණි. ලුම්බිණි බෞද්ධ විශ්වවිද්‍යාලයේ මහාචාර්ය පූජ්‍ය නේපාලයේ සංකිච්ච හිමියෝ ඉන් අනතුරු ව කඨිනානිසංස දේශනාව පැවැත්වූහ.
නේපාලයේ ශ්‍රී ලංකා තානාපති හිමාලි අරුණතිලක මහත්මිය, සාර්ක් කමිටුවේ මහලේකම් ඇසල වීරකෝන් මහතා,නේපාල සන්නද්ධ පොලිස් බළකායේ පොලිස්පති ශෛලේන්ද්‍ර ඛනාල් මහතා, ශ්‍රී ලංකා තානාපති කාර්යාලයේ සහ සාර්ක් මහලේකම් කාර්යාලයේ නිලධාරීන්,ශ්‍රී ලංකා දුටුගැමුණු විශ්‍රාම ශාලාවේ නිලධාරීන් මෙන් ම නේපාලයේ වෙසෙන රැකියාවේ නියුතු ශ්‍රී ලාංකිකයින් සහ ආරාධිතයන් බොහෝ පිරිසකගේ සහභාගිත්වයෙන් මෙම ආගමික උත්සවය පැවැත්විණි.
