මාධ්‍ය නිවේදනයක් නිකුත් කරමින් ජාතික ඩෙංගු මර්දන ඒකකය පෙන්වා දෙන්නේ 2021 නොවැම්බර් මස 04 දින වන විට ශ්‍රී ලංකාවේ ඩෙංගු යැයි සැක කරන රෝගීන් 22,902ක් වාර්තා වී ඇති බවයි.

මෙයින් 2,979ක් 2021 ඔක්තෝබර් මස ද, 505ක් නොවැම්බර් මස පළමු දින 04 තුළද වාර්තා වී ඇත. ඩෙංගු වාහක මදුරුවන් සහ මදුරු කීටයන් පිළිබදව රට පුරා කරන ලද සමීක්ෂණ අනූව ඩෙංගු මදුරුවන් බෝ වෙන ස්ථාන වැඩි වීමක් දක්නට ලැබෙන අතර ඒ හා සමගාමීව ඉදිරි සති කිහිපයේදී ඩෙංගු රෝගීන් වාර්තා වීම වැඩිවීමක්ද අපේක්ෂා කරයි.

මෙම තත්ත්වය වසංගත අවධියක් දක්වා වර්ධනය වීම වළක්වා ගැනීම අරමුණු කරගනිමින් මෙම විශේෂිත ඩෙංගු මර්දන වැඩසටහන් ක්‍රියාත්මක කරන බවද කොවිඩ් 19 වසංගතයේ පීඩාව ක්‍රම ක්‍රමයෙන් මිදෙමින් සිටින මෙම මොහොතේ රටපුරා ඩෙංගු වසංගතයක් පැතිරුණහොත් නැවත විශාල පීඩාවකට මුළු රටම පත්විය හැකි බැවින් මෙම අවස්ථාවේ කොවිඩ් 19 වසංගතය මෙන්ම ඩෙංගු වසංගතයක්ද පැතිරීම වළක්වාගැනීම අප සැමගේ වගකීමක් බවද අවධාරණය කර ඇත.