විගණකාධිපති දෙපාර්තමේන්තුවේ විගණන පරීක්ෂකවරයකු ලෙස රාජ්‍ය සේවයට බැඳුනු අනුෂ පැල්පිට මහතා පසුව,ශ්‍රී ලංකා පරිපාලන සේවයට ඇතුළත් විය. පරිපාලන සේවා කාලය තුළ ඒකාබද්ධ සේවා සහකාර අධ්‍යක්ෂ, ජනාධිපති සහකාර ලේකම්, ජනාධිපති අරමුදල ගණකාධිකාරී, සංවර්ධන ලොතරැයි මණ්ඩලය අධ්‍යක්ෂ හා වැඩබලන සමාන්‍යධිකාරි , ශ්‍රී ලංකා රූපවාහිනී සංස්ථාවේ අධ්‍යක්ෂ ජනරාල්, රජයේ ප්‍රවෘත්ති දෙපාර්තමේන්තුව නියෝජ්‍ය අධ්‍යක්ෂ, අධ්‍යක්ෂ සහ පළමු අධ්‍යක්ෂ ජනරාල් ලෙස සේවය කළේ ය.
ශ්‍රී ලංකා ගුවන් විදුලි සංස්ථාවේ සභාපති, ලංකාපුවත් ආයතනයේ සභාපති තනතුර සැලසිනේ ආයතනයේ නිසි බලධාරී තනතුර අනූෂ පැල්පිට මහතා විසින් දරා තිබේ. ශ්‍රී ලංකා විදුලි සංදේශ නියාමන කොමිෂන් සභාව අධ්‍යක්ෂ ජනරාල් ධූරයේ කටයුතු කළ අනූෂ පැල්පිට මහතා, ශ්‍රී ජයවර්ධනපුර විශ්වවිද්‍යාලයේ වාණිජවේදි උපාධිධාරියෙකු වන අතර 2003/ 2004 වර්ෂවල ඔස්ට්‍රේලියාවේ වික්ටෝරියා විශ්වවිද්‍යාලයෙන් වෘත්තීය ගණකාධිකරණය පිළිබඳ පශ්චාත් උපාධියක් ලබා තිබේ.
2020 දෙසැම්බර් 19 වැනි දින ජනාධිපතිතුමා විසින් කර්මාන්ත අමාත්‍යාංශය ලේකම්වරයා ලෙස පත් කළ අතර ජනමාධ්‍ය ලේකම් ධූරය ලැබීමට පෙර අනූෂ පැල්පිට මහතා,ආර්ථික ප්‍රතිපත්ති හා සැලසුම් ක්‍රියාත්මක කිරීමේ අමාත්‍යාංශයේ ලේකම්වරයා ලෙස කටයුතු කළේ ය.
නව ජනමාධ්‍ය ලේකම්වරයා රාජකාරි ආරම්භ කරන අවස්ථාවට ජනමාධ්‍ය අමාත්‍යංශයේ අතිරේක ලේකම් (පාලන) එස්.ආර්.ඩබ්.එම්.ආර්.පී. සත්කුමාර මහතා, අතිරේක ලේකම් (සංවර්ධන හා සැලසුම්) එච්. හේවගේ මහතා, රජයේ ප්‍රවෘත්ති අධ්‍යක්ෂ ජනරාල් මොහාන් සමරනායක මහතා ඇතුළු ජනමාධ්‍ය අමාත්‍යංශයට අනුබද්ධ ආයතනවල ආයතන ප්‍රධානීන් රැසක් සහභාගී වූහ.
