ශ්‍රී ලංකාවේ චීන තානාපති චී. ජෙන්හොන් මහතා අද (05) පෙරවරුවේ කථානායක මහින්ද යාපා අබේවර්ධන මහතා හමුවූ අතර චීන මහජන කොන්ග්‍රසයේ ස්ථාවර කමිටු සභාපති (චීන පාර්ලිමේන්තුවේ කථානායක) ලී ෂන්සු මහතාගේ නව වසර සඳහා වන සුබ පැතුම් පනිවුඩය, ගරු කථානායකවරයා වෙත පිළිගැන්වීමද සිදුවිය.
චීනය සහ ශ්‍රී ලංකාව අතර පවතින ද්වීපාර්ශවීය සබදතා ශක්තිමත් කිරීම සදහා මෙම වසරේද කැපවන බව චීන තානාපතිවරයා මෙහිදී පැවසීය. සුබපැතුම් පිරිනැමීම පිළිබදව චීන මහජන කොන්ග්‍රසයේ ස්ථාවර කමිටු සභාපති (චීන පාර්ලිමේන්තුවේ කථානායක) ලී ෂන්සු මහතාට සහ තානාපතිවරයාට ගරු කථානායකවරයා සිය ස්තුතිය පළ කළේය.
චීනය නිරතුරුව ශ්‍රී ලංකාව‍ට ලබා දෙන සහය පිළිබදවද ගරු කථානායකවරයා මෙහිදී සිය ස්තුතිය පළ කළේය.
පාර්ලිමේන්තුවේදී පැවති මෙම හමුවට පාර්ලිමේන්තුවේ නියෝජ්‍ය මහලේකම් සහ කාර්ය මණ්ඩල ප්‍රධානී කුෂානි රෝහණදීර මහත්මිය ද එක්විය.
රජයේ නිල පුවත් වෙබ් අඩවිය පවත්වාගෙන යනු ලබන්නේ රජයේ ප්‍රවෘත්ති දෙපාර්තමේන්තුවේ නව මාධ්‍ය ඒකකය මගිනි. 1996 වර්ෂයේ මැද භාගයේ දී news.lk නමින් ආරම්භ කළ එය අන්තර්ජාලයට මුදාහරින ලද්දේ 1997 මාර්තු මස 01 දින දීය. එතැන් පටන් සිංහල, දෙමළ හා ඉංග්‍රීසි භාෂාවලින් පවත්වාගෙන යනු ලබයි.
+94 11 366 3040
