රජයේ ප්‍රවෘත්ති දෙපාර්තමේන්තු පරිශ්‍රයේ අද ( ජනවාරි 11) පැවති කැබිනට් තීරණ දැනුම් දීමේ මාධ්‍ය හමුවට එක්වෙමින් අමාත්‍යවරයා මේ බව පැවසුවේ චීන විදේශ අමාත්‍යවරයා මෙරටට පැමිණීමෙන් පසු ඔහු සමඟ අත්සන් කළ ගිවිසුම පසුගිය යහපාලන රජය අත්සන් කිරීමට කටයුතු කළ නිදහස් වෙළඳ ගිවිසුම් පන්නයේ එකක්දැයි මාධ්‍ය කළ විමසුමකට පිළිතුරු වශයෙනි.
වැඩිදුරටත් අදහස් දැක්වූ අමාත්‍යවරයා පැවසුවේ නිදහස් රටක් වශයෙන් ශ්‍රී ලංකාව කිසිඳු රාජ්‍යයක සතුරකු නොවන බවත්, ලොව ඕනෑම රටක් සමඟ රාජ්‍ය තාන්ත්‍රික ගිවිසුම් අත්සන් කිරීමට හැකියාව ඇති බවත්ය.
මීට පෙරද ඉන්දියාව, චීනය වැනි රාජ්‍ය සමඟ මේ ආකාරයේ ද්වී පාර්ශවික ගිවිසුම් අත්සන් කළ බවත්, මෙම ගිවිසුමේ සැඟවූ හෝ විශේෂ කිසිවක් නොමැති බවත්, ඉන්දියාවද මෙරටට ලබාදෙන සහාය තවදුරටත් දිගු කිරීමට කටයුතු කර ඇති බවත් අමාත්‍යවරයා පැවසීය.
