මෙරටට ෆාම් තෙල් ආනයනය කරනු ලබන්නේ විශේෂිත කරුණු සඳහා පමණක් වන හෙයින් ෆාම් තෙල් ආනයනික බද්ද අඩු කිරීම සම්බන්ධව රජය විසින් කිසිඳු තීරණයක් ගෙන නොමැති බව සම කැබිනට් මාධ්‍ය ප්‍රකාශක, වැවිලි කර්මාන්ත අමාත්‍ය වෛද්‍ය රමේෂ් පතිරණ මහතා ප්‍රකාශ කළේය.
ඒ මහතා මේ බව කියා සිටියේ, අද (02) රජයේ ප්‍රවෘත්ති දෙපාර්තමේන්තුවේ පැවති කැබිනට් තීරණ දැනුම් දීමේ මාධ්‍ය හමුවේ දී මාධ්‍යවේදියෙකු විසින් ඉදිරිපත් කළ, ඉදිරියේ දී ආනයනික ෆාම් තෙල් සම්බන්ධව හා ප්‍රමිතියෙන් යුතු පොල්තෙල්වල ආනයනික බද්ද අඩුකිරීමට රජය ගනු ලබන තීරණ පිළිබඳව වූ පැනයට පිළිතුරු වශයෙනි.
එමෙන්ම, ගුණාත්මකභාවයෙන් ඉහළ පොල්තෙල් මෙරටට ආනයනය කිරීමේ දී පනවා තිබෙන බදුවල කිසියම් වෙනසක් සිදු කළ යුතු ද සහ සිදු කළ හැකි ද යන්න පිළිබඳව සකච්ඡා කරමින් තිබෙන බවත්, එහෙත් ඒ සම්බන්ධව ද කිසිඳු තීරණයක් මේ වන විට ගෙන නොමැති බවත් හෙතෙම වැඩිදුරටත් පැවසුවේය.
