අනීතිකව සිදුවන අයථා අන්‍යාගම්කරණය මෙම පළාතේ සීඝ්‍රයෙන් ක්‍රියාත්මක වන බවටත්, එය වහා නැවැත්වීමට නීති සම්පාදනය කළ යුතු බවත් පූජ්‍ය කන්තලේ රාහුල, මැදිරිගිරියේ සීවලී, අලුත්වැවේ පේමරතන, දොම්පේ ශාන්ති විහාරී, දිඹුලාගල රාහුල හිමිවරු සහ ඥානරත්නම් කුරුක්කල්තුමා ඇතුළු හින්දු භක්තිකයන් නියෝජනය කරන පිරිසක් ද තම අදහස් ප්‍රකාශ කළහ.
පොළොන්නරුව ජල ගැලුම් නිම්නය වනෝද්‍යානය ඇතුළු රටේ සියලු ජාතික වනෝද්‍යාන ආරක්ෂා විය යුතු බවත් වන සංහාරයට එරෙහිව සියල්ලන්ටම සමානව නීතිය ක්‍රියාත්මක විය යුතු බවත් පූජ්‍ය නිකපිටියේ චන්දිම හිමියෝ පෙන්වා දුන්හ.
වැලි ජාවාරම්වල නිරත වන පුද්ගලයන්ට හා ඔවුන්ගෙන් අයතා ලෙස මුදල් ලබා ගන්නා රාජ්‍ය නිලධාරීන්ට විරුද්ධව නීතිය ක්‍රියාත්මක විය යුතු බව නිරෝෂණී සුනේත්‍රා කුමාරි මහත්මිය පැවසුවාය. වැලිමංකඩ බෙදා දීමේදී අදාළ ප්‍රදේශයේ ජනතාවට ප්‍රමුඛතාව ලැබිය යුතු බවත්, නීතිය ක්‍රියාත්මක කරන නිලධාරීන් මුදලට යටවීම වැළක්විය යුතු බවත් ඇය ප්‍රකාශ කළාය.
යුධ සමයේදී සිය ගම් බිම් අතහැර ගිය ජනතාව නැවත පදිංචි කරවීමේදී ඉඩම් නීතිය සැමට සමානව ක්‍රියාත්මක නොවීම සහ වැලිකන්ද වැනි ප්‍රදේශවල ඇතැම් ඉහළ රාජ්‍ය නිලධාරීන් ඉඩම් බලතල, තමා අයත් ජන වර්ගයට විශේෂ පක්ෂපාතීත්වයක් සහිතව ක්‍රියාත්මක කිරීම නිසා ප්‍රදේශයේ ජනතාව, විහාරස්ථාන හා කෝවිල් වැනි ආගමික ස්ථාන ද දැඩි පීඩනයකට පත්ව ඇති බව පෙන්වා දුන් එච්. එම්. සිරියලතා, සිවලිංගම් සිවසුන්දරම්, වෛද්‍යාචාරිණී තිලකාවතී යන මහත්ම මහත්මීහු ඇතුළු පිරිස රාජ්‍ය නීති සියලු ජන කොටස්වලට සමානව ක්‍රියාත්මක විය යුතු බව පැවසූහ.
රටේ සෑම දරුවකුටම පොදු අධ්‍යාපනයක් ලබා දිය යුතු බවත්, ඉඩම් නීතිය, පරිසර නීතිය, මාර්ග නීති ආදී නීති සැමට සාධාරණව ක්‍රියාත්මක විය යුතු බවත්, වන සංහාරය හා ඉඩම් කොල්ලය මුවාවෙන් සිදුවන ආගමික අන්තවාදය පැතිරීමට ඉඩ නොතැබිය යුතු බවත් බෞද්ධ භික්ෂූන් වහන්සේ සහ වෙනත් ආගමික නායකයෝ වැඩිදුරටත් සඳහන් කළහ.
ශ්‍රී ලංකාව තුළ එක රටක් එක නීතියක් යන සංකල්පය ක්‍රියාත්මක කිරීම සම්බන්ධයෙන් විවිධ පාර්ශ්වයන් දරන අදහස් සහ මතවාදයන් සැලකිල්ලට ගනිමින් එකී සංකල්පය අධ්‍යයනය කිරීමෙන් අනතුරුව රට තුළ එය ක්‍රියාත්මක කිරීම සඳහා වූ සංකල්ප පත්‍රිකාවක් ඉදිරිපත් කිරීම වෙනුවෙන් අතිගරු ජනාධිපති ගෝඨාභය රාජපක්ෂ මැතිතුමන් විසින් පූජ්‍ය ගලගොඩඅත්තේ ඥාණසාර හිමියන්ගේ සභාපතිත්වයෙන් පත්කරන ලද ජනාධිපති කාර්ය සාධක බලකාය මේ වන විට රටේ විවිධ පළාත් ආවරණය කරමින් මහජන අදහස් විමසීම හා විද්වත් යෝජනා ලබා ගැනීම සිදු කරමින් සිටී.
ජනාධිපති කාර්ය සාධක බලකායේ සභාපති රාජකීය පණ්ඩිත පූජ්‍ය ගලගොඩඅත්තේ ඥාණසාර ස්වාමින් වහන්සේ, සමාජිකයන් වන මහාචාර්‍ය ශාන්ති නන්දන විජේසිංහ, වෛද්‍ය සුජීව පණ්ඩිතරත්න, නීතිඥ සංජය මාරඹේ, එරන්ද නවරත්න, පානි වෑවල යන මහත්වරු සහ එහි ලේකම් ජීවන්තී සේනානායක මෙනවිය මේ අවස්ථාවට එක්ව සිටියහ.
