මෙම සාකච්ඡාව තුළදී ඛනිජ හා ඛනිජ වැලි සම්පත් වෙනුවෙන් අගයදාම නිෂ්පාදන ව්‍යාපෘතීන් ක්‍රියාත්මක කිරීමේ අවශ්‍යතාව දීර්ඝව කතිකාවට ලක්වුණු අතර එහිදී මතුවන ගැටළු හා බාධාවන් පිළිබඳවද පුළුල් සාකච්ඡාවක් කෙරිණි.
අමාත්‍යවරයා මෙහිදී අදහස් දක්වමින් කියා සිටියේ, ශ්‍රී ලංකාව තුළ ඇති ඛනිජ හා ඛනිජ වැලි සම්පත් ස්ථානීයව මෙන්ම ගුණාත්මකව හා ප්‍රමාණාත්මකවද විධිමත් ගවේෂණයට ලක් කොට අගයදාම නිෂ්පාදන වැඩසටහන් කඩිනමින් ක්‍රියාත්මක කළ යුතු බවයි. එහිදී එම අගය එකතුකල නිෂ්පාදනයන් ක්‍රියාත්මක කිරීමට ලෝකයේ නව්‍ය තාක්ෂණය , අද්‍යතන ප්‍රවණතා මෙන්ම ගෝලීය වෙළෙඳපොළ තත්වයන් කෙරෙහිද විශේෂ අවධානය යොමුකල යුතු බවත් සදහන් කල අමාත්‍යවරයා ඒ මගින් වැඩි ආර්ථික ප්‍රතිලාභයක් රටට අත්කර දිය හැකි බවත් වැඩිදුරටත් සදහන් කළේ ය.
එමෙන්ම මෙම සාකච්ඡාව තුළදී අගයදාම නිෂ්පාදන විධිමත් කිරීමට යම් නිෂ්චිත වැඩපිළිවෙළක් සැකසීමට මෙන්ම ඒ ආශ්‍රිත සමාගම්වලට , කර්මාන්ත කරුවන්ට හා ව්‍යවසායකයින්ට උපරිම පහසුකම් සැපයීමටත් අවශ්‍ය කටයුතු කතිකා කෙරිණි. මෙහිදී ගෝලීය තත්වයන් යටතේ තාක්ෂණය මත පදනම් වූ විධිමත් කතිකාවක් රට තුළ ඇති කිරීමටත් එකගතාවය පළ කෙරිණි.
මෙම අවස්ථාවට මහාචාර්ය අජිත් ද අල්විස් , මහාචාර්ය අතුල සේනාරත්න , කර්මාන්ත අමාත්‍යංශයේ ලේකම් තිලකා ජයසුන්දර , අතිරේක ලේකම් වරුන් වන රංජිත් විමසූරිය , චමින්ද පතිරාජ , ලංකා ඛනිජ වැලි සමාගමේ , ලංකා කාර්මික සංවර්ධන මණ්ඩලයේ , කහටගහ ග්‍රැෆයිට් ලංකා සමාගමේ , භූ විද්‍යා සමීක්ෂණ හා පතල් කාර්‍යංශයේ සභාපතිවරුන් , නිළධාරින් සහ කර්මාන්තකරුවන් ඇතුළු සම්භාවනීයන් පිරිසක් එක්වූහ. එමෙන්ම මෙම අවස්ථාවට සූම් තාක්ෂණය ඔස්සේ මහාචාර්ය අමිල රත්නායක , මහාචාර්ය එච්.එම්.ටී.ජී.ඒ.පිටවල , මහාචාර්ය ගාමිණී රාජපක්ෂ , ආචාර්ය එල්.පී.එස්.රෝහිත යන මහත්වරුන්ද එක්වූහ.
