ප්‍රවීණ ගායන ශිල්පී නිහාල් නෙල්සන් මහතාගේ දේහය අද (14) පෙරවරුවේ ජාතික ගුවන් විදුලි පරිශ්‍රයට රැගෙන එන ලදී.
ජනමාධ්‍ය, ප්‍රවාහන හා මහාමාර්ග අමාත්‍ය ආචාර්ය බන්දුල ගුණවර්ධන මහතා ද ජාතික ගුවන් විදුලි පරිශ්‍රයට පැමිණ නිහාල් නෙල්සන් මහතාගේ දේහයට අවසන් ගෞරව පුද කළේය.
මෙරට ගීත ඉතිහාසයේ වාර්තා රැසකට හිමිකම් කියන ඒ මහතා ප්‍රසංග වේදිකාවේ අනිවාර්ය, නැතිවම බැරි බයිලා ගායකයා ද විය මෙරට වැඩිම කැසට්පට ගණනක් නිකුත් කළ පුද්ගලයා ලෙස ද ප්‍රවීණ ගායන ශිල්පී නිහාල් නෙල්සන් මහතා වාර්තා අතරට එක්වෙයි. කැසට් පට 113 ක් පමණ නිකුත් කළ නිහාල් නෙල්සන් මහතා සැළකෙන්නේ, මෙරට වැඩිම ගීත කැසට්පට සංඛ්‍යාවක් හා පළමු සී. ඩී. තැටිය නිකුත් කළ ගායකයා වශයෙනි.
සොමියට වරෙන් පුතා අගුල් දාලා නෑ දොරේ, කුක්කු කූ කූ කුකුළ අඬනවා, කිරිදුන්නේ දරුවන්ටයි, කරුණා සුවඳ තවරාලූ, කාවඩි බයිලා, සල්ලි මිටි ගණන් ආදී ජනප්‍රිය ගීත රැසක් ඔහු විසින් ගායනා කරනු ලැබූ ගීත අතර වේ. ඔහු ගායනා කර ඇති ගීත සංඛ්‍යාව පන්දහසකට අධිකය.
1946 ජනවාරි 09 වැනිදා උපත ලැබු ඒ මහතා ඊයේ (13) උදෑසන හදිසියේ අභාවප්‍රාප්ත විය. ඒ මහතා මිය යනවිට 76 වන වියේ පසුවිය. නිහාල් නෙල්සන් මහතාගේ දේහයට අවසන් ගෞරව දැක්වීමේ අවස්ථාවට අධිකරණ අමාත්‍ය ආචාර්ය විජයදාස රාජපක්ෂ මහතා මෙන් ම කලාකරුවන් විශාල පිරිසක් ද එක්ව සිටියේ ය.
