තෛයිපොංගල් දින පණිවිඩය...
ශ්‍රී ලාංකිකයන්ද ඇතුළුව ලොව පුරා දෙමළ ජනතාව ඉමහත් ප්‍රබෝධයෙන් එක්ව සමරන 2023 වසරේ ප්‍රථම උත්සවය , තෛයිපොංගල් උත්සවයයි. එහෙයින්, එළඹෙන තෛයිපොංගල් දිනය සාරවත්,ප්‍රීතිමත් මෙන්ම අධ්‍යාත්මික සුවය යෙහෙන් රැඳුණු උත්සවයක් වේවායි මම ප්‍රථමයෙන්ම සුභාසිරි ගෙන එනු කැමැත්තෙමි .
අස්වැන්න දියුණු වනු පිණිස සූර්යයා විසින් කළ මෙහෙවරද, එය තවත් සාරවත් කිරීමට වර්ෂාව ලබාදුන් දායකත්වයද, ගව-මහීෂාදී සත්ත්වයින්ට කෘතගුණ සැලකීමද මෙම තෛයිපොංගල් උත්සවයේ මුඛ්‍ය අරමුණයි.
දෙවියන් හා සොබාදහම සමඟ නිරතුරුව බැඳී සිටින අප සහෝදර දෙමළ ප්‍රජාව ආර්ථික පීඩා, රෝ දුක් ආදී සිය ජීවිතයේ අත් විඳින්නට සිදුවන කවර අසීරු - දුක්ගැහැට මධ්‍යයේ වුවද මෙම උත්සවය අනිවාර්යෙන්ම සමරනුයේ හද පිරි සතුටිනි. ඔවුන් සිය කෙත්බිමෙන් නෙළාගත් , නව අස්වැන්න තමන් විශ්වාස කරන ඉරු දෙවියන් ඇතුළු සෙසු දෙවිවරුන්ට පූජා කරන්නේ, කළගුණ සැලකීම සිය දිවිය හා බැඳුණු ගෞරවනීය වගකීමක් ලෙස සලකමිනි . දෙමළ ජනතාවගේ සම්ප්‍රදායික මාස ක්‍රමය අනුව ජනවාරි මස හැඳින්වෙනුයේ තෛමාසය නමිනි. එය අතිශය විචිත්‍රවත් සංස්කෘතිකාංග රැසකින් සමන්විත උත්සවයකි. සිය නිවසෙහි පිරිසිදු බව ප්‍රමුඛ කටයුත්තක් කරගත් දෙමළ කාන්තාවන්ගේ රමණීය කෝලම් රටාවෙන් හැඩවුණු ගෙමිදුල මෙම පොංගල් උත්සවයෙහි අමතක නොකළ යුතු, අතිශය අලංකාරවත්, සුන්දර සලකුණක් වෙයි.
තෛපොංගල් උත්සවය විසින් ගෙනෙන ලාංකික අප කා හටත් වැදගත් පණිවිඩ කිහිපයක් වෙයි. මට අනුව, පසුගිය වසරෙහි අප අතින් සිදුවූ වැරදිවලින් අත්මිදී, නැවුම් අපේක්ෂා පෙරදැරිව, නව වසරට එළඹීමට ඉටා ගැනීම ඒ අතරින් අතිශය වැදගත් සිරිතකි. එය තෛපොංගල් උත්සවයට ප්‍රථමයෙන් භෝගිපොංගල් පරණ අවුරුද්දේ අපේ හින්දු ජාතික හිතවතුන් සමරන අවසන් චාරිත්‍රය ද වේ.
2023 වසරෙහි ලොවට උදා වූ අසිරිමත් තෛයිපොංගල් උත්සවය ජාති භේදයකින් තොරව, පොංගල් කිරිබත් මුළු රටටම බෙදන්නට හැකි කරුණාබර සිත් පහළවන, සහයෝගය, සමානාත්මතාවය, සමෘද්ධිය මෙන්ම රෝ- පීඩාදී උවදුරුවලින් මිදුණු, නව හෙට දිනකට ඇරඹුමක් වේවා!
මහින්ද යාපා අබේවර්ධන,
කථානායක,
ශ්‍රී ලංකා පාර්ලිමේන්තුව.
