ඒ සම්බන්ධයෙන් මුදල් රාජ්‍ය අමාත්‍යවරයා විසින් මාධ්‍ය නිවේදනයක් නිකුත් කරමින් අද(පෙබරවාරි 02) මේ සම්බන්ධයෙන් සඳහන් කර ඇත.
අමුද්‍රව්‍යයක් ලෙස රබර් ආනයනය සම්බන්ධයෙන් සොයාබැලීමට පත් කළ කමිටුව මුදල් අමාත්‍යාංශයේ දී රැස්වී දීර්ඝ වශයෙන් සිදු කළ සාකච්ඡාවේ දී මෙම තීරණය ගත් බව අමාත්‍යවරයා සඳහන් කළේය.
මෙම කමිටුව මගින් ගනු ලැබූ ක්‍රියාමාර්ග හේතුවෙන් අතිරික්ත රබර් ආනයනය ශීඝ්‍රයෙන් පහළ වැටුනු අතර 2022 වසරේ දෙසැම්බර් මාසයේ දී ඉකුත් වසරේ එම මාසයට සාපේක්ෂව රබර් ආනයනය 93%කින් පහළ වැටී දේශීය රබර් ආශ්‍රිත නිෂ්පාදන අපනයනය ද 39%කින් ඉහළ ගියේ ය.
මෙම කමිටුව මුදල් රාජ්‍ය අමාත්‍ය රංජිත් සියඹලාපිටිය මහතාගේ ප්‍රධානත්වයෙන් රැස් වෙමින් දීර්ඝ වශයෙන් කරුණු සාකච්ඡා කළ අතර විටින් විට මතු වූ තත්ත්වයන්ට පිළියම් යොදමින් දේශීය රබර් වගාකරුවා ආරක්ෂා කිරීමට පියවර ගත්තේ ය.
වැවිලි කර්මාන්ත අමාත්‍ය වෛද්‍ය රමේෂ් පතිරණ මහතාගේ ද සහභාගීත්වයෙන් පැවැති මෙම විශේෂ කමිටු රැස්වීමේ දී තව දුරටත් විවිධ ක්‍රමවේදයන් ඔස්සේ ආයෝජන මණ්ඩල අනුමැතිය සහිතව සහ රහිතව රබර් ආනයන කරන ආකාරයන් කිහිපයක් පිළිබඳ කරුණු සාකච්ඡා කෙරිණි.
විශේෂයෙන් ම ඇතැම් බහුජාතික සමාගම් රබර්වල ගුණාත්මකභාවය හුවා දක්වමින් ඉහළ මිල ගණන් යටතේ තව දුරටත් රබර් ආනයනය සිදු කරන බවට තොරතුරු මෙහි දී අනාවරණ විය. ඒ අනුව මුදල් රාජ්‍ය අමාත්‍ය රංජිත් සියඹලාපිටිය මහතා සඳහන් කළේ මෙම කරුණු පිළිබඳ වාර්තාවක් ජනාධිපති රනිල් වික්‍රමසිංහ මැතිතුමා වෙත සුදුසු ක්‍රියාමාර්ග ගැනීම සඳහා ඉදිරිපත් කරන බවයි.
2022 ඔක්තෝබර් මස 09 වැනි දින අදාළ කමිටුව පත් කෙරුණේ වැවිලි කර්මාන්ත අමාත්‍යාංශ ලේකම් බී.එල්.ඒ.ජේ. ධර්මකීර්ති මහතාගේ ප්‍රධානත්වයෙනි.
