වෙඩිමුරයක් පවත්වා උත්තමාචාර පුද කිරීමේදී ලබාදිය හැකි උපරිම වෙඩිමුර ප්‍රමාණය 25 ක් වන අතර, එය ජාතිය වෙනුවෙන් පිරිනැමේ. ඒ අනුව අද දින (2023 පෙබරවාරි 04) 75 වැනි අභිමානවත් නිදහස් දිනයට සමගාමීව ජාතිය වෙනුවෙන් පිරිනමන වෙඩි මුර උත්තමාචාරය මෙලෙස ශ්‍රී ලංකා නාවික නෞකා ගජබාහු නෞකාවේදී පැවැත්වීමට නාවික හමුදාව විසින් කටයුතු කළ අතර, මෙම අවස්ථාව විද්‍යුත් මාධ්‍ය ඔස්සේ මහජනතාව වෙත සජීවීව දැක ගැනීම සඳහා පහසුකම් සැලසීමටද නාවික හමුදාව විසින් කටයුතු කෙරිණි.

14 වන ශතවර්ශයේ සිට වෙඩිමුර චාරිත්‍රය යුද නෞකාද අනුගමනය කර තිබෙන අතර, මෙහිදි යුද නෞකාවක් මිතුරු රාජ්‍යයකට ඇතුලුවිමෙදි නෞකාවේ ඇති අවිවලට පුරවා ඇති උණ්ඩ දල්වා අවිය නිරායුධ කර ඇති බවට සහතික කර තිබේ. එමෙන්ම, මිතුරු රටේ වෙරළ ආරක්ෂාව සඳහා තබා ඇති අවිද එම අවි වලට පුරවා ඇති උණ්ඩ ආරක්ෂිත දිශාවකට එල්ල කර දල්වා අවිය නිරායුධ බවට පැමිණෙන නෞකාවට සහතික කර තිබෙන අතර, මෙය පසුකාලින ආචාර කිරීමේ චාරිත්‍රයක් බවට පත්ව තිබෙනවා.

බ්‍රිතාන්‍ය නාවික හමුදාව එවකට නෞකාවන්ගේ අවි 07 ක් තිබූ බැවින්, අවි 07ක් උපයෝගීත්වයෙන් වෙඩි මුර ආචාරය පවත්වා ඇත. ශ්‍රී ලංකා නාවික හමුදාවේ වෙඩිමුර ඉතිහාසය දෙස බැලීමේදී මුල් වතාවට නිදහස් දිනයක් වෙනුවෙන් වෙඩි මුර 15 ක ආචාරයක් රාජකීය නාවික හමුදාව විසින් ගාලු මුවදොර පිටියේදී 1948 වර්ෂයේදී පවත්වා ඇත. 1949 වර්ෂයේදී එක් අවියක් උපයෝගී කරගනිමින් මෙම වෙඩිමුර උත්තමාචාරය විජය නෞකාවේදී පවත්වා ඇත. මෙම වෙඩිමුර ආචාරය නාවික හමුදාව 1948 වර්ෂයේ සිට අඛණ්ඩව පවත්වා තිබෙන අතර, ආරම්භයේදී ප්‍රථම වෙඩිමුර උත්තමාචාරය ගාලු මුවදොර පිටියේදීත්, පසුව නෞකා මත දීත් අනතුරුව, කොළඹ වරායේ ගෝල් බක් බේ ස්ථානයේ සහ කොළඹ ප්‍රදිපාගාර පරිශ්‍රයේදීත් මෙම උත්තමාචාරය පවත්වා ඇත.

73 වන නිදහස් දිනයට සමගාමීව 2021 වර්ෂයේ ජාතිය වෙනුවෙන් වෙඩිමුර උත්තමාචාර 25 ක් පිරිනැමීම ශ්‍රී ලංකා නාවික නෞකා සමුදුර නෞකාවේදීත් 74 වන නිදහස් දිනය වෙනුවෙන් වෙඩිමුර උත්තමාචාරය පිරිනැමීම පසුගිය 2022 වර්ෂයේ ශ්‍රී ලංකා නාවික නෞකා ගජබාහු නෞකාව මතදීත් නාවික හමුදාව විසින් සිදුකල අතර, මෙවර 75 වැනි නිදහස් දිනය නිමිත්තෙන් ජාතිය වෙනුවෙන් අද දින (2023 පෙබරවාරි 04) වෙඩිමුර උත්තමාචාර 25 ක් පිරිනැමීම ශ්‍රී ලංකා නාවික නෞකා ගජබාහු නෞකාව මතදී සිදු කරන ලදී.

වෙඩි මුර උත්තමාචාරය පැවැත්වෙන අවස්ථාවේ නෞකාවේ කුඹගසෙහි විශේෂ ධජ සැරසිල්ලක් සිදුකරනු ලබන අතර, ධජ මගින් කියවෙන ඉංග්‍රීසි අක්ෂර සහ ඉලක්කම් උපයෝගී කරගනිමින් වෙඩිමුර උත්තමාචාරය “ 25 Gun Salutes for the Nation” ලෙස අර්ථ ගැන්වෙන ලෙස ශ්‍රී ලංකා නාවික නෞකා ගජබාහු නෞකාවේ කුඹගස සැරසීම සිදු කෙරිණි.

75 වන නිදහස් දින උළෙලට සමඟාමීව ජාතිය වෙනුවෙන් වෙඩිමුර 25ක් පැවැත්වීම ශ්‍රීලංනානෞ ගජබාහු නෞකාවේ සවිකළ බ්‍රසීලයේ නිශ්පාදිත මිලි මීටර 47 වර්ගයේ අවි 04ක් මඟින් සිදුකරන ලද අතර, ආචාර වෙඩිමුර කණ්ඩායම ශ්‍රීලංනානෞ ගජබාහු නෞකාවේ අණදෙන නිලධාරී, කපිතාන් ඉන්දික ද සිල්වා මහතා, විධායක නිලධාරී කොමාණ්ඩර් සුමුදු දිසානායක සහ අවි නිලධාරී ලුතිනන් කොමාණ්ඩර් මිලින්ද යාපා මහතා යන නිලධාරීන්ගෙන් සමන්විත විය.