මෙවර ලෝක කාන්තා දිනයේ තේමාව වන්නේ “සමානාත්මතාව වැළඳගමු” යන්න වන අතර කාන්තාවට හිමිවන සමාන අවස්ථා ප්‍රමාණවත් නොවන්නේ ඇයි යනුවෙන් කථිකාවක් ලෝකය තුළ ඇතිකිරීමට නියමිතය.
කාන්තා අයිතිවාසිකම් ව්‍යාපාරය, ස්ත්‍රී පුරුෂ සමානාත්මතා ගැටළු, කාන්තා ප්‍රජනන අයිතීන්, විවිධ ක්ෂේත්‍රවල කාන්තා ජයග්‍රහණ සහ කාන්තාවන්ට එරෙහි ප්‍රචණ්ඩත්වය සහ අපයෝජනයන් කෙරෙහි මෙවර ජාත්‍යන්තර කාන්තා දිනය සිය අවධානය යොමු කරයි.
එම දිනය අළලා ශ්‍රී ලංකාව තුළද විවිධ වැඩසටහන් ක්‍රියාත්මක කිරීමට නියමිත අතර කාන්තා දිනය එක් දිනකට පමණක් සීමා නොකර, නව නීති රීති, ප්‍රතිපත්ති සම්පාදනය හා පවුල් මට්ටමින් කාන්තා ජීවිත ගොඩනැගීමේ නව ක්‍රියාදාමයන් රැසක් ඉදිරියේ දී ක්‍රියාත්මක කිරීමට කාන්තා, ළමා කටයුතු හා සමාජ සවිබලගැන්වීම් අමාත්‍යංශය අපේක්ෂා කරයි.
