හින්දු භක්තිකයන්ගේ ශුද්ධ වූ ග්‍රන්ථය ලෙස සැලකෙන ශ්‍රීමත් භගවත් ගීතාව සම්බන්ධ ආගමික සිදුවීම් මාලාව සහ ශ්‍රීමත් භගවත් ගීතාව වෙනුවෙන් වන්දනීය උපහාරයක් පිදීමට ඉන්දියාවේ හර්යානා ප්‍රාන්තයේ කුරුක්ෂේත්‍ර සංවර්ධන මණ්ඩලයෙන් වාර්ෂිකව භගවත් ගීතා මහෝත්සවය පවත්වයි. මෑත වර්ෂවලදී එම උත්සවය විදේශ රටවල පවත්වා ඇති අතර, මෙවර ජාත්‍යන්තර ගීතා මහෝත්සවය බුද්ධශාසන, ආගමික හා සංස්කෘතික අමාත්‍යාංශයෙන් මෙරටදී පැවැත්වීමට කටයුතු සංවිධාන කර තිබේ.
ඕනෑම ආගමික, සංස්කෘතික පිරිස්වලට කිසිදු භේදයකින් තොරව මේ සඳහා සම්බන්ධ විය හැකි අතර, නොමිලේ පැවැත්වෙන මේ වැඩසටහනට සම්බන්ධවී විවිධ අත්දැකීම් ගන්නා ලෙස බුද්ධ ශාසන, ආගමික හා සංස්කෘතික අමාත්‍යාංශය ජනතාවගෙන් ඉල්ලා සිටී. පෙ.ව 9.00 සිට රාත්‍රී 12.00 දක්වා පැවැත්වේ.
හෙට (02) පස්වරුවේ නෙළුම් පොකුණ රඟහලේ පැවැත්වෙන වැඩසටහනට මෙරට ප්‍රධාන රාජ්‍ය නායකයන්ගේ සහ ඉන්දියාවේ හර්යානා ප්‍රාන්තයේ ආණ්ඩුකාරවරයා සහභාගි වීමට නියමිතය. 03 වැනිදා ඉන්දියාවේ සිට පැමිණෙන සියයක පමණ කණ්ඩායම සහ පූජකවරුන්ගේ ප්‍රධානත්වයෙන් විශේෂ පූජාවක් පැවැත්වේ.
දරු- දැරියන් සඳහා මේ දින තුනේදී විවිධ වැඩසටහන් පැවැත්වෙන අතර, සංස්කෘතික ප්‍රසංග, අලෙවි ප්‍රදර්ශන, පොත් ප්‍රදර්ශන, භගවත් ගීතාව පදනම් කර ගත් ප්‍රදර්ශන, සංගීත ප්‍රසංග, ගීතා මහෝත්සවය පිළිබඳව කථිකාවත්, රූකඩ සංදර්ශන ආදිය මෙහිදී පැවැත්වේ
