දෙසැම්බර් මස 23 වැනිදා සිට 31 වැනිදා දක්වා එක්සත් අරාබි එමීර් රාජ්‍යයේ පැවැත්වෙන යොවුන් ආසියාන කුසලාන තරඟාවලිය මෙහෙයවීම දුනිත් වෙල්ලාලගේ විසින් සිදුකරනු ඇත.

පිතිකරණ අංශය තවදුරටත් ශක්තිමත් කිරීම අරඹයා තවත් අතිරේක පිතිකරුවකු ලෙස කොළඹ ලුම්බිණි විදුහලේ සකුණ ලියනගේව සංචිතයට එක් කිරීමට පියවර ගෙන තිබේ. මෙම තරගාවලි සඳහා නම් කරන ලද ශ්‍රී ලංකා කණ්ඩායමට ඇතුළත්ව සිටින සෙසු ක්‍රීඩකයින් බංග්ලාදේශයට සහ එංගලන්තයට එරෙහිව ඉකුත්දා නිමාවට පත් වුණු තරඟවල දී කැපී පෙනෙන දක්ෂතා දැක්වීමට සමත් විය.

කණ්ඩායමේ සමස්යතක් ගෙන බැලීමේදී විශේෂඥ පිතිකරුවන් හත් දෙනෙකු, වේග පන්දු යවන්නන් සිව් දෙනෙකු, දඟ පන්දු යවන්නන් සිව් දෙනෙකු සහ කඩුලු රකින්නන් දෙදෙනකු ඇතුළත්ව සිටිති.

නායක දුනිත් වෙල්ලාලගේ, චමිඳු වික්‍රමසිංහ සහ යසුරු රුද්‍රගෝ තුන් ඉරියව් ක්‍රීඩකයෝ වෙති. අභිෂේක් ලියනආරච්චි, සදීෂ රාජපක්ෂ, ෂෙවෝන් ඩැනියල්, පවන් පතිරාජ, රවීන් ද සිල්වා, රනුද සෝමරත්න සහ සකුණ ලියනගේ පිතිකරුවන් වන අතර, චමිඳු වික්‍රමසිංහ, යසිරු රුද්‍රගෝ, විනුජ රන්පුල් සහ මතීෂ පතිරණ වේග පන්දු යවන්නෝ වෙති. දුනිත් වෙල්ලාලගේ, වනුජ සහන්, මල්ෂ තරුපති සහ ට්‍රෙවීන් මැතිව් දඟ පන්දු යවන්නන් ලෙස කණ්ඩායමට එක් වද්දී අන්ජල බණ්ඩාර සහ සදීෂ් යවර්ධන කඩුලු රකින්නන් ලෙස එක්ව සිටිති.

මෙම තරගාවලිය ඉලක්ක කර ගනිමින් ශ්‍රී ලංකා යොවුන් කණ්ඩායම ඉකුත් මාස කීපය මුළුල්ලේම නේවාසික පුහුණු සැසි ගණනාවකට සහභාගිවූ අතර ලෝක ශූර බංග්ලාදේශ පිලට සහ එංගලන්ත පිලට එරෙහිව එක්දින තරඟ 2 කට ද ක්‍රීඩා කිරීමේ අවස්ථාව ශ්‍රී ලංකා ක්‍රිකට් ආයතනය විසින් ලබා දීමට පියවර ගනු ලැබීය. එහිදී බංග්ලාදේශ පිලට එරෙහිව 5-0 ක් සහ එංගලන්තයට එරෙහිව තරඟාවලිය 3-2 ක් ලෙස ජයග්‍රාහීව අවසන් කිරීමට අවිෂ්ක ගුණවර්ධන ප්‍රධාන පුහුණුකාරීත්වය දරනු ලබන ශ්‍රී ලංකා යොවුන් පිල සමත්විය.

‘බී’ කාණ්ඩය යටතේ ආසියානු කුසලාන තරඟය සහභාගිවන ශ්‍රී ලංකා පිල දෙසැම්බර් මස 24 වැනිදා කුවේට් කණ්ඩායමට එරෙහිව පළමු සටන දියත් කරනු ඇත. 26 වැනිදා නේපාලනයට එරෙහිව තරඟ වදින ශ්‍රී ලංකා පිල 28 වැනිදා නැවතත් බංග්ලාදේශ පිල සමඟ තරඟ කරනු ඇත. ලීග් ක්‍රමයට පැවැත්වෙන පළමු වටයේ තරඟාවලියෙන් අනතුරුව ඉදිරියට පැමිණෙන කණ්ඩායම් 4 අතර පැවැත්වෙන අවසන් පූර්ව තරඟ වටයෙන් අනතුරුව දෙසැම්බර් මස 31 වැනිදා අවසන් මහ තරගය පැවැත්වෙනු ඇත.

අවිෂ්ක ගුණවර්ධන මහතා ප්‍රධාන පුහුණුකරු ලෙසින් කටයුතු කරනු ලබන ශ්‍රී ලංකා යොවුන් කණ්ඩායමේ, පන්දු රැකීමේ පුහුණුකරු ලෙස උපුල් චන්දන, දඟ පන්දු පුහුණුකරු ලෙස සචිත් පතිරණ, වේග පන්දු පුහුණුකරු ලෙස චමිල ගමගේ සහ පිතිකරණ පුහුණුකරු ලෙස ධම්මික සුදර්ශන යන මහත්වරුන් කටයුතු කරති. කළමනාකරු ලෙසින් මහින්ද හලංගොඩ මහතා කටයුතු කරනු ඇත.

- Sri Lanka Cricket -