මෙම වැඩසටහන යටතේ කාන්තාවන් දස ලක්ෂයක් තෝරාගෙන, ඒ සෑම කෙනෙකුගේ ම ආදායම රුපියල් ලක්ෂයකින් ඉහළ නැංවීමට අපේක්ෂා කෙරේ.
තෝරා ගත් අක්කර 1/4ක භූමි භාගයක් තුළ අපනයන කෘෂි බෝග හා ඔසු පැළ වගා කර, ඒවා අපනයන මට්ටමට අගය එකතු කිරීම මෙම වැඩසටහනේ මූලික අරමුණයි.
තෝරා ගත් ඉඩම, අදාල බෝග වගාව සඳහා සූදානම් කිරීමට අවශ්‍ය පුහුණුව හා දැනුම ප්‍රාථමික කර්මාන්ත අමාත්‍යාංශයේ අපනයන කෘෂිකර්ම දෙපාර්තමේන්තුව විසින් ලබා දෙනු ලැබේ.
ඉන්පසු අපනයන කෘෂි බෝග පැළ ඛෙදා දීම සිදු කෙරේ.
මීට අදාළව අපනයන කෘෂි බෝග පැළ ලබා ගැනීමේ හිමිකම් පත්‍ර සංඛේතාත්මකව ප්‍රදානය කිරීම ඊයේ ජනාධිපතිතුමා අතින් සිදු කරනු ලැබූයේය.
මෙම වැඩසටහන හරහා ලබා ගන්නා නිෂ්පාදන සඳහා අවශ්‍ය දේශීය හා ජාත්‍යන්තර වෙළඳපොළ අවස්ථාවන් ලබා දීමට ද මෙහිදී ප්‍රාථමික කර්මාන්ත අමාත්‍යාංශයේ අවධානය යොමුව තිබේ.
එසේම, නිසි අගය ධාමයක් යටතේ අගය එකතු කිරීමට අවශ්‍ය වැඩපිළිවලක් ද ආරම්භ කිරීමට යෝජනා වී තිබේ.
මේ අතර, "ධන සවිය" ජාතික ආර්ථීක සංවර්ධන වැඩසටහන සඳහා ලියාපදිංචි කර ගැනීම් මේ වන විට අපනයන කෘෂිකර්ම දෙපාර්තමේන්තුව විසින් ආරම්භ කර තිබේ.
මීට අදාල උපදෙස් හා වෙනත් තාක්ෂණික සහායන් ලබා දීම සඳහා ප්‍රාථමික කර්මාන්ත අමාත්‍යාංශයේ 011-2-878-678 යන අංකය ඇමතීමෙන් ලබා ගත හැකි බව ද ඒ මහතා වැඩිදුරටත් සඳහන් කරයි.
