අතිපූජ්‍ය කොටුගොඩ ධම්මවංශ ස්වාමීන් වහන්සේ මෙම උත්සවයේ ආගමික වතාවත් සිදු කළහ. මහා සංඝරත්නයේ සෙත් පිරිත් සජ්ඣායනා මධ්‍යයේ ආරක්ෂක ලේකම්වරයා විසින් නව විශ්‍රාම ශාලාවේ සවිකර තිබූ සමරු එලකය නිරාවරණය කරන ලදී.
සියලුම සනීපාරක්ෂක පහසුකම් සහිතව ඉදිකර ඇති මෙම නව විශ්‍රාම ශාලාවෙහි එකවර 20 දෙනෙකුට පමණ නවාතැන් පහසුකම් සැපයිය හැකි වේ. සිවිල් ආරක්ෂක බලකායේ අධ්‍යක්ෂ වයිස් අද්මිරාල් ආනන්ද පීරිස් මහතාගේ මගපෙන්වීම මත සිවිල් ආරක්ෂක බලකාය විසින් මෙම අති නවීන විශ්‍රාම ශාලාව ඉදිකරන ලදී.
ජෝන් කීල්ස් හෝල්ඩින්ස් සහ සීටීසී (CTC) යන සමාගම් මේ සඳහා අවශ්‍ය මුල්‍ය දායකත්වය සැපයීය. "උරුමයක උල්පත" පදනම මෙහි සම්බන්ධීකරණ කටයුතු සිදු කෙරිණි.
මෙහිදී ආරක්ෂක ලේකම්තුමා, මෙම විහාරස්ථානයට දීර්ඝ කාලීන අවශ්‍යතාවක්ව පැවති මෙම විශ්‍රාම ශාලාව ඉදිකිරීම සඳහා මුල්‍ය දායකත්වය ලබා දුන් ආයතනවලට මෙන්ම ඉදිකිරීමට ශ්‍රම දායකත්වය ලබාදීම සම්බන්ධයෙන් සිවිල් ආරක්ෂක දෙපාර්තමේන්තුවේ සාමාජිකයන්ට ද සිය ප්‍රශංසාව හා ස්තූතිය පුදකර සිටියේය. එසේම මෙම අවස්ථාව සිහිපත්වීම සඳහා ගෝඨාභය රාජපක්ෂ මහතා විසින් මෙම පූජා භූමියේ පැළයක් රෝපණය කිරීම ද සිදු කරන ලදී.
මෙම අවස්ථාව සඳහා මහා සංඝරත්නය ඇතුළු පාර්ලිමේන්තු මන්ත්‍රීවරුන් ආරක්ෂක සේනා නැගෙනහිර ආඥාපති මේජර් ජෙනරාල් ලාල් පෙරේරා, ජනාධිපති ජ්‍යෙෂ්ඨ උපදේශක මිලින්ද මොරගොඩ, ජ්‍යෙෂ්ඨ හමුදා නිලධාරීන් හා බෞද්ධ සැදැහැවතුන් විශාල පිරිසක් සහභාගී වූහ.
NDH/mod
